Raruman Nagsikabarang

Pinakbet

Say pinakbet nangibuwat ya kano sa Ilukos sa saritá nin "pinakebbet" saya wanan kumebet. Say ipapangwá nan sitin luto ket sakalakon bugá sa amyanan Luson tan namagatanan Luson a iyusar nin bagoong tan pipising.

Pinakbet

Ipasiya no makáno a rabay nin lutuen. Say nasusukat iti ket makagwá yaytin maipakangan saray ánem nin tawo.

Rikado:

3 kutsaron nin tabá undino ladak nin panglutó
3 pisí nin bawang a napitpit
2 kutsaron nin láya a napitpit tan natiritir
1 kaalakin bugá nin sabuyas a naiwá nin padadaikleng
1/4 kilo nin karnin baboy a naiwá nin padadaikleng
2 kaalakin bugá nin kamatis a naiwá nin padadaikleng
2 kaanron sili a napisí tan naglatan yay bibikoy.
4 kutsaron nin baguong munamon udino aramang
1 tasa nin ranum
1/8 kilo nin kalabasa a naiwá nin padadaikleng
1/8 kilo nin agayap a naputul-putol
1/8 kilo nin tarom a naputul-putol
1/8 kilo nin ukra
1/8 kilo nin paryá, naglat a laman tan bikoy tan naiwa-iwá nin maimpis
1/8 kilo nin urang a nailupis

Iusar yay alakin kawalí ta ipámutan yay tabá tano maigisa yay bawang, láya tan sibuyas nin rwan minuto. Ikalamó yay karnin baboy tan ipagisa ya anggan nakatektekan anan bugá.

Ilaok yay kamatis, sili, baguong tan ranum. Ipakalabey yay ngámin mísa nin ipabugá yay amot, isakban yay kawalí ta ipalabey yan bugá anamana nin liman minuto.

Ilaok yay kalabasa, agayap, tarom, ukra tan paryá, isakban yay kawalí ta lutuen yan mapuló nin minuto tan ipatuloy nin kiwar-kiwaren anamaet.

Ilaok yay urang tan ituloy in lutuen anamanan liman minuto. Ilamó yay baguong aramang udino say asin no matkap et a taway. Galaten yay kawalí sa amot tano kai maiparuyroy a lutó.